10月22日早上六點鐘, 有少少濕既感覺, 喺廁所出出入入, 研究左成個鐘, 先敢肯定真係穿咗水。叫醒左老公, 施施然換衫再去麥記享受咗個早餐先出發去醫院, 吸收左上次既經驗, 未痛係未生得既, 所以慢慢去都未遲。

入到醫院, 知道穿水後如果24小時我都未作動, 就會喺第二朝八點催生, 老公陪左我一陣就叫左佢返去休息等我 call, 我就喺醫院等待小寶寶既動靜。開始既時候係好輕微咁有少少拿住, 仲行得走得咁同悠媽&仲賢媽去探阿比比(剛在21號開刀出世), 跟住成個下晝都 keep 住痛, 由五分鐘痛一次, 至到夜晚都係四分鐘痛一次, 每次都係痛幾十秒, 姑娘話我要痛到成個肚都痛晒, 同起碼每次over 一分鐘先至係, 我既情況有排都未得。

夜晚十點幾, D胎水變左綠色, 姑娘話我可能太緊張, BB 喺入面唔舒服屙咗D胎糞出黎, 我要即落產房駁機check 住BB 既情況, 嗰時我先開得嗰一度。姑娘叫我通知老公, 我將要熄電話入產房, 但就叫我唔好叫老公黎, 因為只有生嗰一刻老公先可以入黎, 之前唔比入, 而我又有排都未生得。

落到去我真係好驚, 不停喺度喊, 求極姑娘佢都話未生得老公唔入得黎。十一點幾打左一次比老公, 老公驚我有可能要開刀, 諗住出發黎醫院,姑娘又好肯定咁講我唔會開刀, 我最快都要等第二朝先生得, 於是老公就唔出黎住。十二點幾開始勁痛, 狅吸笑氣吸都high high 地先叫有幾分鐘唔痛。其間不斷聽到其他產房傳出黎既慘叫聲, 姑娘鬧人聲, 痛上加痛....兩點幾姑娘同我睇我只不過開左兩度, 我已經痛到死咁滯, 吸氣打止痛針都己經止唔到痛, 我已經到達左十級痛既巔峰......

到三點幾差唔多四點, 我 feel 都我個子宮抽住痛, 每次痛都成個人抽一抽, 仲 feel 到佢想出黎.... 姑娘一睇我已開到六度, 叫我 call 老公黎..... 再痛多幾個字, 姑娘叫我不如而家生囉! 我隨住每一下抽痛而用力, 佢地不斷催我叫我快D屙佢出黎, 因為佢心跳開始低...... 我繼續努力, 終於用左十幾分鐘既時間, 屙左佢出黎。

2008年10月23日, 凌晨4:42, 重3.15KG 既區小林同袁小英既愛情結精品誔生喇!!!

最終老公飛的都飛唔切黎, 不過咁快生到佢出黎真係非常好! (之前聽住隔離產房慘叫半個鐘狅比姑娘鬧都生唔出, 又有人生五分鐘就生左 @@) 最攪笑生完姑娘比個 BB 我睇問我係咩黎, 當時我get唔到佢係想問我仔定女, 我既眼淨係睇到佢成身胎糞, 我就答: 係屎黎! 姑娘好大反應話: 吓? 你生左舊屎呀?

聯針聯左成粒鐘, 望住BB 喺隔黎暖箱望吓望吓, 個口'"梅"吓"梅"'吓, 呢個就係喺我個肚住左十個月既BB 喇~~~ 好感動 TvT